Die Hexen vum Grobrunn übernahmen Nußlocher Rathaus – Rede von Madeleine Dörfer
(fwu) Heute, am 11.11.22 stürmten die Hexe vum Grobrunn um 11.11 Uhr aus einer Seitenstraße Richtung Rathaus, wo sie Bürgermeister Joachim Förster zur Kapitulation und Übergabe des Stadtschlüssels aufforderten. Dies übernahm die Jugendwartin Madeleine Dörfer, die die Rede zum Rathaussturm hielt:
Narri Narro, ihr Leit s’isch Zeit,
Mir Hexe leite oi die Faschingszeit.
Des Corona is imma noch e leidisch’s Pflaschda
Sorgt noch heit fa Kumma un Laschda. D’Faschingszeit isch’are wie imma zum Opfer gfalle,
Awwa d’Walpurgisnacht hawwe ma gfeiert mit aich alle.
Des war sou schee mol widda e Feschdl zu mache. Mit alte und neije Freunde uhne Maulkorb zu lache.
Awwa d’Faschingsumzieg fehle uns imma noch. Musch schun uffbasse, dass de Rock von de Motte kriegt koa Loch.
Drum hoffe ma jetz uffs neije Joahr. Des muss besser wärre; ich doch kloar.
NARRI – NARRO
De Jogi hot uns letschd Joahr versproche, On de Walpurgisnacht e Tänzle mit uns zu rocke.
Doch des Verspreche hot’a gebroche, Drum muss a nächst Joahr mit de Kinna schwinge die Glocke.
Es gibt extra va die Sume en neije Donz,
Denn musch jetzt iewe von Grund uff gonz.
Du kriegsch von uns e Leihmask mit Kostiem, Womit dich kannsch verausgawe gonz ungestiem.
Awwa damit du triffsch mit em grouße Bessem ned unsa Kinna, Kriegsch den kloane jetz als Strof fa imma.
Mia hoffe du kummsch pünktlich zu de Probe, Damit ma dich on de Walpurgisnacht a kenne lobe.
NARRI – NARRO
Jetzt kumme ma awwa mol zu annere Dinge, Die uns in Nußloch zum nochdenke bringe.
In Nuẞloch gibt’s seit diesem Joahr sogenannte „Mitfahrbänke“. Uns Hexe straube sich do die Hoar, wenn ma nur drodenke.
Schun im Kinnagarde wärsch belehrt:
Oizustaije in fremde Autos isch fakehrt! Selbst die Polizei kummt in die Schul,
Um zu saache: trampe is ned cool.
A wond größer bisch kriegsch noch befohle: Ruf o, isch hol die ab bevor d’wärsch gstohle.
Doch Nußloch schmeißt des jetzt alles iwwa de Haufe. Sehe mia des falsch oder messa ma uns e rosa Sunnebrille kaufe?
Wärs ned bessa e kloans 9er Dorfbussl zu organiesieren, Wo tüschdige Rentner könnte stündlich rumrangieren.
Do wärre die Mitfahrbänke a sicherlich genutzt
Und bliewe ned wie jetzt unbenutzt.
Ma kehnt e Monatskärtle drucke
Und d’Leit dede dodevor a Geld rausrucke.
Des wär doch mit Sicherheit ä gudi Sach,
Drum denkt mol driwwa noch, mit Bedacht.
NARRI – NARRO
So viel Stadtsherifs wie in Nußloch siehsch
Hosch eh schneller en Strofzettel wied en Parkplatz findsch. On de katholisch Kärsch dut sich en neije Zebrastreife befinne,
Damit die Leit de Weg widda in’d Kärsch noi finne.
Awwa am Linneplatz do isch noch nix.
Do mäst a ona no und zwar fix!
Die Schieler und Marktoikaafer messe do iwwa die Stroẞ. Do treibt’s ohm die Träne in’d Aache bloß.
Die Rennstreck vun Maischbach nooch Nußloch isch doch klar,
Is gfährlich fa jedermann, isch’s ned wahr?
In Nußloch isch jetzt bald iwwaral die 30er-Zoon. Jetzt kummt bald s‘ laschdefahrrad des isch koan Hohn.
Mia dede donn a nutze des Dorfbussl gonz bstimmt, Weil ma isch jo kaputt bis ma mim Laschdefahrrad d’Massegass nuff kimmt.
Denn jeder Supermarkt liegt im Unnadorf, Wenn’d hoam willsch musch de Buckel nuff ins Dorf.
Die kloane Läde mache all zu
Und die Bonke wolle a nix me du.
Jetzt wolle se uns a noch’s Bargeld nemme. Wie sollsch do als Veroi noch Feschdlin feiern kenne?
Doch nun isch’s genug fa heit,
Denn mir wolle ins Rothaus nei.
Jogi rick de Schlissl raus,
Fa diech is jetzt bis Aschermittwoch aus die Maus!
Mia wolle mol gucke was ma kenne rette
Und du gehsch probe und liegsch ned faul im Bette!
NARRI – NARRO
Kurz-URL: https://nussloch-lokal.de/?p=155484
